،
،
لا غشاك الليل واسرف بـك الحـزن العميـق
جنّـب وجيـه البشـر واسـجـد لخلاّقـهـا
*
ادخل بغيبوبه مـن الهـدوء .. ولا تفيـق !!
وراود دموعـك علـى عينـهـا واحداقـهـا
*
خل روحك تدّرج !! من زفيـر اليـا شهيـق
دمعـة ٍ لحضورهـا .. دمـعـة ٍ لفراقـهـا
*
كن دمعـك وقتهـا يغسلـك ويبـل ريـق :
وجه الارض !! وينتزع روحك مـن ارهاقهـا
رتّب انفاسك !! ودوّر علـى نفسـك طريـق
واستـرح بيـن الحنايـا وفــل ارواقـهـا
*
راجع ذنوبك على اقل من مهلـك .. وويـق :
شــوف وتفـقّـد معاليـقـك وخفّـاقـهـا
*
الحزن : دافـع قـوي للرجـال .. ولا يعيـق
غيـر نـاس ٍ تخلـق وذلّهـا فاعناقـهـا !!
*
الشقيـق يدعّـم الـذل فـي اخـوه الشقيـق
والبضايـع تختلـف باخـتـلاف اسواقـهـا
*
وانت حاضـرك يتفاخـر بماضيـك العريـق
شجـرة ٍ عجـز الزمـن لا يحـت اوراقهـا
*
كنْه شمس من الذهـب والجواهـر والعقيـق
كل صبـح يلامـس المجـد نـور اشراقهـا
*
وكان عزمك ما رقى قمـة الضلـع المويـق
ما انت لاقي ( عـز ) فـي جلالهـا ودقاقهـا
*
نوّخ ركابك .. وشكّـل مـن اشكالـك فريـق
الرخامـه فـي تزايـد عــدد عشّاقـهـا !!
*
الاسامي حمل !! واللي حمـل مـا لايطيـق :
شـاه ودك للصفـاه الضـحـى تستاقـهـا !!
*
العـرب مـا تبغـي الفخفخـه ولا البـريـق
تبغـي امطـار السحـب ماتـبـي برّاقـهـا
*
لا تحسب المرجلـه : زول ولسـان ٍ طليـق
الرجـال رجــال : بافعالـهـا واخلاقـهـا
*
افرد اجناحـك مـدام السمـا تبغـى عشيـق
اغتسل مـن غيمهـا / فـج كبـد افاقهـا !!
*
خل اخوك الصبر !! واعجابك بنفسك صديق !!
واعتنـز بالله كفـيـل البـشـر وارزاقـهـا
*
لا تفكر في هـل الهـرج لـوّ شبّـوا حريـق
الكـلاب مربّـطـه لا تـحـل وثاقـهـا !!
*
وكان صدرك من خباليـن خلـق الله يضيـق
والله ان تبطي ضلوعـك بضيـق خناقهـا !!
*
وان تغنيت بشعـر فـي فعولـك مـا يليـق
نقّـع جـزال القصايـد وبـلّ اوراقـهـا !!
*
لا تكلف نفسك ( بزوبعـة جـال المضيـق )
( المحيطـات أربعـه ) والـدرّر باعماقـهـا
*
مادرى الشاطي عن الخوف بعيـون الغريـق
ولا لعب في حسبـة النـاس غيـر اشواقهـا
*
فإن دعاك الشوق للـورد وانفـاس الرحيـق
اذكـر اجمـل سيـدات التـرف واعناقـهـا
*
المهاه .. الفارع .. أسطورة الحـس الرقيـق
مـا ذبحـك إلا غلاهـا وطـول فراقهـا !!
،
،
منقول